ଓଡ଼ିଶାବାସୀଙ୍କୁ ନବବର୍ଷର ଅଭିନନ୍ଦନ ଜଣାଇଲେ ଧର୍ମେନ୍ଦ୍ର

ନୂଆବର୍ଷ ଓଡ଼ିଆ ଜାତି ପାଇଁ ଉତ୍ସାହ ଏବଂ ଉଦ୍ଦୀପନାର ବର୍ଷ ହେଉ: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ
ଭୁବନେଶ୍ୱର, ଜାନୁଆରୀ ୧: ମହାପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦରେ ଇଂରାଜୀ ନୂତନ ବର୍ଷ ୨୦୨୧ ବିଶ୍ୱ, ଦେଶ ଓ ସମସ୍ତ ଓଡ଼ିଆ ଜାତି ପାଇଁ ଉତ୍ସାହ ଓ ଉଦ୍ଦୀପନାର ବର୍ଷ ହେଉ । ମହାପ୍ରଭୁଙ୍କ ଆଶୀର୍ବାଦ ସମସ୍ତଙ୍କ ଉପରେ ରହିଥାଉ ବୋଲି ଭୁବନେଶ୍ୱର ଠାରେ ଗଣମାଧ୍ୟମକୁ ପ୍ରତିକ୍ରିୟା ଦେବା ଅବସରରେ କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

ଶ୍ରୀ ପ୍ରଧାନ କହିଛନ୍ତି ଯେ ବର୍ଷ ୨୦୨୦ ଅନେକ ସମସ୍ୟା ଓ ଆହ୍ୱାନ ସହ ଶେଷ ହୋଇଛି । କରୋନାର ପ୍ରକୋପ ବିଶ୍ୱ, ଦେଶ ଓ ରାଜ୍ୟକୁ ପ୍ରଭାବିତ କରିଛି । କିନ୍ତୁ ଦେଶର ନାଗରିକ ମାନଙ୍କ ସାମୂହିକ ଦୃଢ଼ ଇଚ୍ଛାଶକ୍ତି ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱ କାରଣରୁ ଆଜି ଦେଶ ସୁରକ୍ଷିତ ହୋଇପାରିଛି । ଦେଶର ଅର୍ଥନୀତି ଧୀରେଧୀରେ ସ୍ୱାଭାବିକ ସ୍ଥିତିକୁ ଫେରୁଛି ।

ଭାରତ ସରକାର କରୋନା ଟୀକା ପ୍ରସ୍ତୁତ ସହ ଅଧିକ ଲୋକଙ୍କ ପାଖରେ ଉପଲବ୍ଧ କରାଇବା ପାଇଁ ଯୋଜନା କରିଛନ୍ତି । କରୋନା ଟୀକା ସଠିକ୍ ଭାବେ ଅଧିକ ଲୋକଙ୍କ ପାଖରେ ପହଁଚାଇବା ୨୦୨୧ର ମୂଳ ଯୋଜନା ବୋଲି ଶ୍ରୀ ପ୍ରଧାନ କହିଛନ୍ତି ।